पर्सामा विजयी अनुहारहरु हेर्नुहोस्

वीरगंज, ७ मंसिर । पर्सामा विजयी भएका उम्मेदवारहरु यतिबेला खुशीयाली साटासाट गर्न व्यस्त भएका छन्।   पर्सा क्षेत्र नम्बर १ मा दोश्रो पटक जित...

वीरगंज, ७ मंसिर । पर्सामा विजयी भएका उम्मेदवारहरु यतिबेला खुशीयाली साटासाट गर्न व्यस्त भएका छन्।  

पर्सा क्षेत्र नम्बर १ मा दोश्रो पटक जित हात पार्दै प्रदीप यादवले विजयी भएका छन्। 

जसपा–एमाले गठबन्धनबाट जसपाका उम्मेदवार यादव २२ हजार ५ सय ३७ मतका साथ लगातार दोश्रो पटक प्रतिनिधिसभा सदस्यमा निर्वाचित भएका छन् । उनका निकटतम प्रतिस्पर्धी स्वतन्त्र उम्मेदवार अजय द्धिवेदीले २० हजार ९ सय १७ मत पाएका छन् । काङग्रेसबाट टिकट नपाएपछि द्धिवेदीले स्वतन्त्र उम्मेदवारी दिएका थिए । यादव र द्धिवेदी बिचको मतान्तर १ हजार ६ सय २० छ ।

यस क्षेत्रमा पाँच दलीय गठबन्धनबाट लोसपाका उम्मेदवार एंव निर्वतमान सांसद लक्ष्मणलाल कर्णको भने जमानत नै जफत भएको छ । सत्तागठबन्धनका उम्मेदवार हुदाका बाबजुद पनि कर्णले १ हजार १ सय १७ मत मात्रै प्राप्त गरि चौथो स्थानमा सिमित हुन पुगेका छन् । तेश्रो स्थानमा रहेका राप्रपाका किरणमान डंगोलले २ हजार ६ सय ५९ मत पाएका पाएका छन् ।

२०४८ देखि २०७४ सम्म भएका ६ वटा निर्वाचनमा कसैले पनि दोहोर्याएर जित हात पार्न नसकेको पर्सा क्षेत्र नम्बर १ मा यादव भने लगातार दोश्रो पटक जित हासिल गर्दै नयाँ इतिहास रचेका हुन् । पर्सा १ मा प्रतिनिधीसभा सदस्यमा लगातार दोश्रो पटक जितेका यादव पुर्व वन तथा वातावरण मन्त्री पनि हुन् । मंसिर ४ को निर्वाचनको देशैभर जारी मतगणनामा देशरभरबाटै जसपाबाट निर्वाचित हुने यादव पहिलो प्रतिनिधीसभा सदस्य पनि हुन् ।

२०७४ को निर्वाचनमा उनि यहि क्षेत्रबाट २१ हजार १ सय ३२ मतका साथ पहिलो पटक प्रतिनिधीसभा सदस्यामा निर्वाचित भएका थिए । २०७० मा भने उनि नेकपा एमालेका उम्मेदवार विचारी यादवसंग पराजित भएका थिए ।

यसैगरी, जनता समाजवादी पार्टी (जसपा) बाट टिकट नपाएपछि स्वतन्त्र उम्मेदवारी दिएका प्रमोद जयसवाल निर्वाचित भएको छ । स्वतन्त्र उम्मेदवार जयसवालको पहिलो जित रहेको छ । पर्सा क्षेत्र नम्बर ३ को (क) को प्रदेशसभा सदस्यमा काउली चुनाव चिन्ह लिएर जयसवाल चुनाव लडेका थिए ।

जयसवाल, ७ हजार ३ सय ८१ मत सहित निर्वाचित भएको मुख्य निर्वाचन अधिकृत विनोद पोखरेलले जानकारी दिए । उनका निकटतम प्रतिस्पर्धी एमाले–जसपा गठबनधनबाट एमालेका उम्मेदवार अब्दुल रहिम अन्सारीले ५ हजार ९ सय ३० मत पाए । जयसवाल र अन्सारी बिचको मतान्तर १ हजार ४ सय ५१ छ । निर्वाचित जयसवाल, सखुवा प्रसौनी गाँउपालिकाका पूर्व अध्यक्ष प्रदीप जयसवालका दाइ हुन् ।

तेश्रो स्थानमा रहेका अर्का स्वतन्त्र उम्मेदवार चन्द्रकिशोर चौधरीले ४ हजार ६ सय ५५ मत पाए भने पाँच दलीय गठबन्धनबाट माओवादी केन्द्रका उम्मेदवार छोटेलाल यादव ४ हजार ५ सय २८ मतका साथ पाँचौ स्थानमा सिमित हुन पुगेका छन् । उनि २०७४ को निर्वाचनमा तत्कालीन संघीय समाजवादी फोरम नेपालको उम्मेदवार बनेर यहि क्षेत्रबाट प्रदेशसभा सदस्यमा निर्वाचित भएका थिए ।

काङग्रेसका चौरसियाको जित

पर्सा क्षेत्र नम्बर २ को प्रतिनिधीसभा सदस्यमा नेपाली काङग्रेसका उम्मेदवार अजय चौरसिया भारी मतान्तरले निर्वाचित भएका छन् । पाँच दलीय गठबनधनका उम्मेदवार एंव काङग्रेस केन्द्रिय सदस्य चौरसिया निकटतम प्रतिस्पर्धी जसपा–एमाले गठबनधनबाट जसपाका उम्मेदवार सुरेन्द्र कुर्मी भन्दा ६ हजार ६ बढि मत प्राप्त गर्दै विजयी भएका हुन् ।

चौरसियाले २८ हजार ४ सय ५१ मत पाउदा कुर्मीले भने २२ हजार ४ सय ४५ मत मात्रै पाएका छन् ।चौरसिया तेश्रो पटक सांसदमा निर्वाचित भएका हुन् । २०५६ र २०६४ को निर्वाचनमा सांसदमा निर्वाचित चौरसिया २०५८ मा सहायक राज्यमन्त्री समेत बनेका थिए ।

२०७४ को निर्वाचनमा भने चौरसिया तत्कालीन संघीय समाजवादी फोरमका विमल श्रीवास्तवसंग पराजित भएका थिए । त्यस बेला श्रीवास्तवले २१ हजार १ सय ६९ मत पाएका थिए भने दोश्रो स्थानमा रहेका चौरसियाले १९ हजार ७ सय ४ मत पाएका थिए ।

पर्सा २ को प्रतिनिधीसभा सदस्यमा राप्रपाका उम्मेदवार नरेश कुमार साहले २ हजार ७ सय ४१ मत पाएका छन् ।

लोसपाका रमेश कुर्मी प्रदेशसभा सदस्यमा निर्वाचित

लोकतान्त्रिक समाजवादी पार्टीले पर्सामा खाता खोलेको छ। पर्सा २ (ख) बाट नेता रमेशप्रसाद कुर्मी प्रदेश सभा सदस्यमा पुनः निर्वाचित भएका हुन। निकटतम प्रतिस्पर्धी स्वतन्त्र उम्मेदवार रूपेशमान सिंहभन्दा २ हजार ६३७ मत ल्याएर उनी दोस्रो कार्यकालका लागि प्रदेश सभा सदस्यमा निर्वाचित भएका छन।

रमेशले ९४७१ मत पाउँदा रूपेशले ६ हजार ८३४ मत ल्याएका छन। रमेशलाई बाम लोकतान्त्रिक गठबन्धनको साथ थियो। एमाले जसपा गठबन्धनका हरेराम प्रसादले ३ हजार ७९० मत ल्याएर तेस्रो भएका छन।

मुख्यमन्त्री लालबाबु राउत पुनः प्रदेशसभा सदस्यमा निर्वाचित

मधेस प्रदेशका मुख्यमन्त्री मोहम्मद लालबाबु राउत पुनः प्रदेशसभा सदस्यमा निर्वाचित भएका छन् ।

पर्सा क्षेत्र नं १ (२) मा जनता समाजवादी पार्टी (जसपा)का उम्मेदवार राउत सात हजार पाँच सय ४५ मतका साथ पुनः प्रदेशसभा सदस्यमा निर्वाचित भएको निर्वाचन अधिकृत विनोद पोखरेलले जानकारी दिए । उनका निकटतम् प्रतिस्पर्धी नेपाली कांग्रेसका उम्मेदवार रामनारायण कुर्मीले छ हजार दुर्ई सय १२ मत पाए।

पर्सा–४ मा कांग्रेसका रमेश रिजाल विजयी

पर्साको निर्वाचन क्षेत्र नम्बर–४ मा कांग्रेसका रमेश रिजाल विजयी हुनुभएको छ।

रिजालले एमालेका जालिम मियाँँलाई ५ हजार ५ सय २३ मतले पराजित गर्नुभयो। रिजालले ३१ हजार १ सय ४२ मत र मियाँँले २५ हजार ६ सय १९ मत प्राप्त गरेका छ।

माओवादीका रहबर अन्सारी विजयी

पर्सा निर्वाचन क्षेत्र १ को प्रदेश सभा निर्वाचन क्षेत्र १ बाट नेकपा (माओवादी केन्द्र)का उम्मेदवार रहबर अन्सारी निर्वाचित भएका छन। अन्सारी एमालेका उम्मेदवारलाई पराजित गर्दै मधेस प्रदेशसभामा निर्वाचित भएका हुन् ।

बुधवार बिहान आएको मतगणनाको अन्तिम परिणामअनुसार अन्सारीले एमाले उम्मेदवार विचारीप्रसाद यादवलाई २ हजार २ सय ९८ मतको अन्तरले पराजित गरेका हुन। अन्सारीले ७ हजार ८ सय १७ मत प्राप्त गरेका थिए। एमालेका उम्मेदवार यादवले भने ५ हजार ५ सय १९ मत प्राप्त गरेका हुन।

प्रदेशसभा सदस्यमा निर्वाचित अन्सारी २०७४ सालको स्थानीय तह निर्वाचनमा वीरगंज महानगरमा माओवादी केन्द्रबाट मेयरका प्रत्याशी थिए।