को हुन मधेश प्रदेशका नयाँ मुख्यमन्त्री सरोज कुमार यादव ?

जनकपुरधाम, पुष २७ । मधेस प्रदेशको दोस्रो मुख्यमन्त्रीमा बारा निर्वाचन क्षेत्र नम्बर १ को ‘ख’ बाट निर्वाचित सरोजकुमार यादव नियुक्त भएका छन् ...

जनकपुरधाम, पुष २७ । मधेस प्रदेशको दोस्रो मुख्यमन्त्रीमा बारा निर्वाचन क्षेत्र नम्बर १ को ‘ख’ बाट निर्वाचित सरोजकुमार यादव नियुक्त भएका छन् । उनी जसपाका संसदिय दलका नेता हुन । बुधबार ६३ सांसदको हस्ताक्षरसहित मुख्यमन्त्रीमा दाबी गरेका ५१ वर्षीय यादवलाई प्रदेश प्रमुख हरिशंकर मिश्रले तत्कालै बुधवार नै मुख्यमन्त्री नियुक्त गरेका हुन् ।

वि.स.२०२८ माघ १० गते बाराको सिमरौनगढ नगरपालिका–३ मा जन्मिएका यादव निरन्तर राजनितिक पदमा रहदै आएका व्यक्ति हुन् । मधेशवादी र गणतन्त्रवादी नेता स्व. गजेन्द्र नारायण सिंहसंगै राजनितिक थालेका बुबा परमान्नद प्रसाद यादव र आमा सिकिल देवीको सन्तानका रुपमा जन्मेका उनी प्रमाणपत्र तहसम्म अध्ययन गरेका छन् ।

०४८ सालबाट सदभावना पार्टीबाट राजनीति सुरु गरेका यादव ०५४ सालमा बाराको तत्कालिन हरिहरपुर गाविसको अध्यक्ष बनेका थिए । ०६४ सालको निर्वाचनमा उनी बारा निर्वाचन क्षेत्र १ बाट तत्कालिन सद्भावना पार्टीबाट संविधानसभा सदस्य भएका थिए । ०६६ सालमा एमालेका महासचिव माधव कुमार नेपालको नेतृत्वमा बनेको सरकारमा उनी वाणिज्य तथा आपुर्ती राज्यमन्त्री बने ।०६८ सालमा भएको निर्वाचनमा उनी पुनः चुनाव जिते र त्यसपछि बनेको डा. बाबुराम भट्टराई नेतृत्वको सरकारमा उनी स्वास्थ्य तथा जनसंख्या राज्यमन्त्री बन्न सफल भए । उनी राज्य मन्त्री बनेको दुवै कार्यकालमा सदभावना अध्यक्ष राजेन्द्र महतो मन्त्री र उनी सोहि मन्त्रालयका राज्य मन्त्री बनेकाले महतोसंग नजिकिए ।

त्यसपछि उनी ०६९ सालमा सद्भावना पार्टीको महासचिव र ०७३ सालमा सोही पार्टीमा उपाध्यक्ष रहेका यादव सदभावना सहित छ दल मिलेर राष्ट्रिय जनता पार्टी (राजपा) गठन हुँदा समेत उपाध्यक्ष पद नै पाए । नेपालको संविधान २०७२ घोषणा भएपछि ०७४ मा भएको पहिलो एतिहाँसिक प्रतिनिधी र प्रदेशसभा निर्वाचनमा भने उनले प्रदेशसभा रोजे र राजपाबाट बारा निर्वाचन क्षेत्र १ को ‘ख’ बाट निर्वाचित भए ।

निर्वाचन पछि मधेसमा दोस्रो ठुलो दलको रुपमा उदाएको राजपाबाट उनी निर्विरोध सभामुख पदमा चयन भएका थिए । पहिलो दल जसपाले मुस्लिम समुदायका लालबाबु राउतलाई मुख्यमन्त्री बनाएपछि राजपाबाट उनी सभामुखका लागि सहज पात्र बने । सभामुख बनेपनि विकास निर्माणका काममा उनको दखलअन्दाजी र मख्यमन्त्रीसंगको समन्वयका कारण जसपाका नेताहरुसंग नजिक भए ।

प्रदेशको राजधानी र नामांकरण गर्ने प्रक्रियामा अभिभावकिय रुपमा भुमिका खेलेका उनले मधेश प्रदेश नाम राख्न नचाहने सांसदहरुलाई समेत कन्भिन्स गरि आफनै कार्यकालमा प्रदेशको नाम मधेश र राजधानी जनकपुरधाम घोषणा गर्न सफल भए । उनको कार्यशैलीले जसपा अध्यक्ष उपेन्द्र यादव प्रभावित हुदै थिए ।

राजपा र संघिय समाजवादी मिलेर बनेको जसपाबाट महन्थ ठाकुर समुह अलग्गिएर लोकतान्त्रिक समाजवादी पार्टी (लोसपा) गठन भएर लोसपा सरकारबाट बाहिरिदा उनी जसपा नै रोजे र सभामुखको पुरा कार्यकाल चलाउन सफल भए । २०७९ को निर्वाचनमा पुनः जसपाबाट सोहि क्षेत्रमा प्रदेशसभा सदस्यमा चुनाव लडेर जितेका उनी मधेश प्रदेशको दोस्रो मुख्यमन्त्रीमा नियुक्त भएका छन् ।

 

The post को हुन मधेश प्रदेशका नयाँ मुख्यमन्त्री सरोज कुमार यादव ? appeared first on Nepal Post Daily.

credit: Nepalpostdaily